3. EMAITZA-KONTUAREN AZTERKETA

Behin balantzea aztertuta, hots, enpresaren egitura azaltzen digun atala, gure eragiketen emaitza aztertuko dugu. Emaitza-kontua edo galdu-irabazien kontua atalean, gure negozioan egin dugun kudeaketa eta lortu dugun emaitza aztertuko ditugu. Galdu-irabazien kontua, izenak berak adierazten duen moduan, sarreren edo salmenten eta epealdi horretan egin ditugun gastu guztien arteko kenketa da. Bistakoa denez, irabaziak ala galerak izan ditzakegu, kontuan hartuta gastatzen duguna baino diru gehiago lortu dugun ala alderantziz. Segidan landuko dugun eskemari jarraituz, gure gastuak zer ataletan antolatu behar ditugun ikusiko dugu.